Wanama waho mdji wa Nyadombweni assalam anlaikum.
Handani ngamdrengo ye furswa yinu ya wudjiliyana mo marangani yaho wananyasi wafariki wo
mwaha rilo nuwo wunu.
Wo muhimu wahe mirongowo ya hangu nge djo wushindjiya hakuwu wuhusu wo msomo na nemayendelewo
yaho mdji wahatru.
Wuhusu wo msomo, hamwando ngambushiriyo na uwa “felicité” owana no wanashe watru wa hundra ye
mitihani randzi nde ya 6ème, BEPC, BAC, wuhondra ye mitihani ya université; rowalo pvondze
na no masiwani.
Mwaha djana tsi “lancer appel” yoka hayina mwana m Nyadombweni wudjo hundra ye BAC ye UGF (Union
des Gnadomboéniens en France) yimlipviye ye "inscription" yaho mwaha wa handani oharimwa ye misomo
ya djuwu. Sha ha bahati mbi, ye "appel" iyo kayidja yishiliwa. Na yapvo kayitsuka mdzadze awu mbaba
ya angaliya mwana, ya mlipviya l’école randzi primaire uhondra terminale wutsuka kadjadjo hundra 50
euros yalipviya ye inscription yahe mwana hahe. Sha emana na kawutowa fikra hama ndayinu ndo wutriya
djitihadi o wana wahundra ye BAC, waretsi ze fikra mbi zawutsoka ngwandzawo wapashiye, hili wende
wadjandzihe ho universite yilo komori.
Mfano, oharimwa owanaziyoni wanane wa hundra ye BAC mwahadjana (2008), mdzima bahi nde yadjandziha
oharimwa ye université ya komori. Iyo anyibu, uwo mdredjeyi dingoni, yizo fikra mbi, iyo maha ya bure
mtsingo hilatsa.
Hayizo, ngeladhimuwo nyi madhwamana wa mdji, awu nyi wa baba, awu nyi ma dhwamana wahe UJEN, mdrenge
satwa yike yo wadjibu hayina mwana mnyadombweni wudjo hundra ye BAC ya “orientewa” yende ya djandzihe
ho universite ya komori hata hayina wakati yadjo wukusudiwa yapashiye yende pvondze yatimizi ye misomo
yahahé.
Uhusu ye mayendeleyo yaho mdji, pvanu ntsi hawu mdji koshindi wa puwa ngawo yeka kapvatsi wandru wa wufikiri
yezendawo ndro ne zendo nayi.
Na bayishe owandru ngwawo, sha owendji oharimwawo, wokwa subuti wahamba ye zendo nayi, koyadjohamba ze ndjama.
Kayiri pva buhe wandru ho mdjini Nyadombweni wado subuti wehamba yezendo nayi na nezendawo ndro. Hawukaya uwo
ndo wakati zendrongowo zidjodo badiliha.
Mfano nonesawo, ngapvo “projet” zifanyiwawo yikawo kazitsu towa fayida tsayila yidjo wu sayidiya owindji wahe
marayiya waho mdji. Ngapvo “projet” yikawo zidjoka na fayida nkuwu oharimwa wo mdji sha ngayidanganyiwawo hawukaya
kayitsi mwafaka namdru Fulani awu kayidja trendelwa ni Fulani. Iyo ndemana yikawo, rowalo komori, rowalo farantsa,
narirentsi ribadili mbapvi ze nafsi ritrendeze yezidjowuka na fayida oharimwa owindji wahe marayiya wamdji.
- Mfano ndahunu farantsa, ye UGF ngiyo yipvililidju, owendji kwatsu tsanga ye 15 euros.
- Wo mdji wutsambaliya hata yapvo rilo pvondze, nguwo zikawo ziruvu (ami, mahabubi, wazuguwa, wafoma namdji, mra wadju,
mra wambwani, yinya X, yinya Y, …)
- Mivurano yamdru na mdru nge baliwawo hudja homarengweni, mivurano, hata ngedo daradja yawutrilana mihono. Yizo ndrongowo
zirisawo.
Tsina wundjiya hakuwu yeza Nyadombweni, owalo yiho ngwadjowuzamba.
Sha mfano mdzima bahi, na ndo wuhusu ye “commune”: o windji wahe midji yahe komori kamili wahisa wehantsi ma “Maires” handziya
za voti, tsibahi madhwamana wasoma walo na wupezo wamatso nizo wandzawo, nawutsaha fayida yaho wendji.
Yo anyibu mdji hama Nyadombweni yikawo nguwo na wandru wambawo wasomo, ngwandzawo ye mayendeleyo ya mdji, yike kwatsushinda
hata wudjohondra lewo wa panga wayihantsi “Maire” wudjo votewa no wendji, udjo wonesa na “programme” yidjo hendesa wusoni wo
mdji.
Ye mifano ngiyo mindji sha kayiri rikaze pvanu.
Ha mwiso ngariwombawo yike yizo rambawo ngazidjo wunafyisha owa zisomawo. Ngariwombawo wadjawu, owanaziyoni wa hundra ze BAC,
ra wunu mwaha na namwaha djana, (hawuka kazidjapvira), wahundre “universités”, reka zapvondze hawu ho masiwani wende wa some
misomo yidjo uwafayi, yi fayidishe wo mdji na nekomori kamili.
Wassalam alaikum.
Nassur SAID ALI